Ngassa awakosha wengi

Mrisho Ngassa alin'gara sana wakati akiitumikia Yanga pengine kuliko wakati mwingine wowote wa maisha yake ya soka.

Mbali na Yanga, Ngassa amewahi kuzichezea Kagera Sugar, Azam FC, Simba, Free State Stars na Fanja ya Oman.

Baada ya kwenda kucheza soka Afrika Kusini, Oman na baadae kurejea nchini ambapo alijiunga na Mbeya City, kiwango cha winga huyo mwenye kasi kilionekana kutetereka.

Lakini tangu ajiunge Ndanda FC, Ngassa ameonekana kurejesha makali yake.

Katika mchezo wa juzi dhidi ya Yanga, Ngassa alitengeneza bao la kufutia machozi la Ndanda FC huku pia akichaguliwa kuwa nyota wa mchezo huo.

Ngassa amejaribu mara kadhaa kurejea Yanga, klabu ya ndoto yake bila mafanikio.

Nakumbuka wakati wa michuano ya Sportpesa baada ya msimu uliopita kumalizika, Ngassa alikuwa mmoja wa wachezaji waliokuwemo kwenye kikosi cha Yanga kilichoshiriki michuano hiyo kabla ya jina lake kukatwa dakika za mwisho.

Umri wake wa miaka 28 bado unamruhusu kuweza kurejea Yanga na kumaliza kazi ambayo mwenyewe anaamini hajaimaliza kama ataendeleza makali yake ya sasa.

Ngassa alijiunga Ndanda akitokea Mbeya City kwa mkataba wa muda mfupi unaomalizika mwishoni mwa msimu, hivyo atakuwa mchezaji huru mwezi Juni 2018.