Klabu ya Yanga imeridhia kufunguliwa kwa Tawi la Wanachama nchini Malawi
Jana baada ya Yanga kuwasili Malawi, miongoni mwa waliojitokeza kuwapokea mabingwa hao wa Tanzania Bara ni mashabiki wa Yanga waishio huko Malawi
Mashabiki hao wakawasilisha ombi lao la kufunguliwa Tawi kwa Rais wa Yanga Injinia Hersi Said ambaye aliagiza mchakato wa kufunguliwa tawi hilo uanze mara moja
"Tumefurahi kuona hapa Malawi Yanga ina mashabiki wengi sana, ombi lenu la kufunguliwa Tawi hapa tumelipokea na nimewaagiza vijana wangu waanze mchakato huo mara moja"
"Nimewaambia hapa mko watu 300, mnaweza kujisajili kuwa Wanachama wa Yanga kupitia simu janja, mkifikisha idadi ya Wanachama 100 basi Tawi lenu litatambulika"
"Kwa mujibu wa Katiba yetu, Tawi hai lenye Wanachama kuanzia 100 linaruhusiwa kutoa Wawakilishi kwenye Mkutano Mkuu wa Wanachama hivyo nanyi Wanayanga wa Malawi mtaweza kushiriki kwenye Mkutano huo kutoa maoni yenu"
"Tunapenda kuona Yanga inakuwa na Wanachama sio hapa Malawi tu, bali iwe dunia nzima," alisema Hersi
Jioni ya leo Yanga itashuka dimba la Bingu kumenyana na Nyasa Big Bullets katika mchezo wa Kimataifa wa kirafiki katika maadhimisho ya miaka 59 ya Uhuru wa Malawi
Takribani mashabiki 41,000 wanatarajiwa kushuhudia mchezo ambao pia utashuhudiwa na Rais wa Tanzania Dk Samia Suluhu Hassan na mwenyeji wake Rais wa Malawi Lazarus Chakwera
