Kocha Mkuu wa Yanga Miguel Gamondi amesema ushindi dhidi ya Namungo Fc yalikuwa matokeo muhimu zaidi licha ya kuwa hakufurahishwa na vile timu yake ilicheza
Aidha Gamondi amebainisha kuwa kimbinu haikuwa rahisi kuipenya ngome ya Namungo Fc ambayo wachezaji 10 walikuwa nyuma ya mpira (walipaki basi)
"Nafikiri ushindi ndio matokeo muhimu kwetu lakini kwa ujumla sikufurahishwa na jinsi tulicheza. Nafahamu kuna mechi tutahitaji ushindi zaidi kuliko kucheza vizuri, hii inaweza kuwa mojawapo"
"Tulikosa umakini kwenye kumalizia lakini pia wachezaji walikuwa na haraka na kufanya maamuzi ambayo hayakuwa sahihi. Wapinzani wetu pia hawakuja kucheza mpira, walitumia kila mbinu ya kupoteza muda na bahati mbaya hakuna hatua zilizochukuliwa dhidi yao"
"Yawezekana uchovu ulichangia kwa wachezaji wangu kukosa ubora wao kwani tumetoka kucheza mechi ngumu siku ya Jumamosi lakini nafurahi tumeweza kushinda," alisema Gamondi
Bao pekee la Yanga katika mchezo huo lilifungwa Mudathir Yahya aliyemalizia krosi ya chini kutoka kwa Yao
Shambulizi lilianzia kwa Jesus Moloko aliyempasia Aziz Ki ambaye alimpenyezea pasi Yao aliyemaliza uwanja kabla ya kupiga krosi ya chini
Ushindi huo umeirudisha Yanga kileleni mwa msimamo wa ligi baada ya kufikisha alama 9 na mabao 11 ya kufunga pasipo kuruhusu bao lolote
