Mlinzi wa kati ya Yanga Dickson Job amesema wanaendelea vyema na maandalizi kuelekea mchezo wa ligi ya mabingwa dhidi ya Al Ahly
Ni mtanange wa kukata na shoka, utapigwa Jumamosi, Disemba 02 katika uwanja wa Benjamin Mkapa, muda wa mchezo ukiwa ni saa 1 usiku
Mchezo huo utaadhimisha Bacca Day ukiwa ni mchezo maalum kwa ajili ya kumthamini na kutambua mchango wa beki Ibrahim Bacca
Job amesema wanatambua Al Ahly ni mabingwa watetezi wa ligi ya mabingwa ikiwa klabu bora barani Afrika kwa sasa. Watawaheshimu kutokana na mafanikio yao lakini hawawezi kuwaogopa kwa sababu kila timu itakuwa na wachezaji 11 uwanjani
Job amesema wanahitaji kuwapa furaha mashabiki wao kwa kushinda nyumbani hasa ikizingatiwa walipoteza mchezo uliopita dhidi ya CR Belouizdad
"Tunarudi kucheza dhidi ya timu bora Afrika na tunawaheshimu, ila hatuwezi kuwaogopa kwani mchezo ni dakika 90 na wachezaji wa pande zote wana uwezo mkubwa wa kucheza"
"Tutaongeza umakini wa kupata matokeo lakini pia kuhakikisha sisi kama mabeki hatuwapi nafasi wapinzani kufunga. Hatupo tayari kupoteza mara mbili hasa uwanja wa nyumbani" alisema Job
Yanga ilipoteza mchezo wa kwanza ugenini kwa kufungwa mabao 3-0 dhidi ya CR Belouizdad hata hivyo ushindi dhidi ya Al Ahly utarejesha matumaini ya Yanga kuwania tiketi kutinga robo fainali ya michuano hiyo
