Yanga kuifuata Singida United kibabe

Kikosi cha Yanga kinatarajiwa kuifuata Singida United leo kwa ajili ya mchezo wa robo fainali kombe la FA (ASFC) utakaopigwa kwenye dimba la Namfua, keshokutwa April 01, 2018.

Yanga iliweka kambi mkoani Morogoro kujiandaa na mchezo huo ambao mshindi atatinga nusu fainali kuukaribia ubingwa.

Timu hiyo inayonolewa na kocha George Lwandamina inakwenda Singida ikiwa na kikosi chake kamili kinachomjumuisha mshambuliaji Donald Ngoma aliyerejea kikosini baada ya kuwa majeruhi kwa muda mrefu.

Hata hivyo Yanga itawakosa Ramadhani Kabwili, Maka Edward na Said Mussa ambao wako kwenye kikosi cha timu ya Taifa ya vijana chini ya miaka 20, Ngorongoro Heroes ambapo kesho itashuka kwenye uwanja wa taifa kucheza na DR Congo katika mchezo wa kusaka tiketi ya kufuzu AFCON 2019.

Pia mshambuliaji Amissi Tambwe aliachwa jijini Dar es salaam licha ya kuwa amepona majeraha. Meneja wa Yanga Hafidh Saleh amesema Tambwe alipewa program maalum ya mazoezi na ataungana na wenzake kujiandaa na mchezo dhidi ya Welayta Dicha.

Saleh amesema wachezaji wengine walio kambini mkoani Morogoro wako tayari kwa ajili ya mchezo huo.