Mlinzi wa kulia wa Yanga Yao Kouassi alichanika nyama za paja katika mchezo wa ligi kuu dhidi ya Azam Fc, nafasi yake ya kucheza mechi ya ligi ya mabingwa dhidi ya Mamelodi Sundowns ni 50/50
Akizungumza katika Mkutano na Wanahabari mapema leo, Msemaji wa Yanga Ali Kamwe, alibainisha kuwa taarifa ya kitatibu iliyotolewa na daktari wa Yanga Moses Itutu imethibitisha majeraha hayo na tayari ameshaanza matibabu
"Yao Kouassi alichanika nyama za paja kwa mujibu wa taarifa ya daktari wetu wa timu, tayari ameshaanza matibabu, madaktari wanapambana kuona kama ataweza kutumika katika mchezo dhidi ya Mamelodi lakini nafasi yake ni 50/50," alisema Kamwe
Kamwe pia alibainisha hali za majeruhi wengine ambapo amesema Kibwana Shomari hali yake imeimarika na siku ya Jumatatu ataanza mazoezi ya uwanjani kama ilivyo kwa Zawadi Mauya ambaye yuko tayari kuanza mazoezi
Kuhusu hali ya Khalid Aucho, Kamwe amesema kiungo huyo anakamilisha awanu ya pili ya program maalum ambayo ni mazoezi ya Gym. Akimaliza program hiyo nae ataanza mazoezi ya kucheza mpira uwanjani
Pia aligusia kuhusu Pacome Zouzoua ambaye pia alipata shida ya goti katika mchezo dhidi ya Azam Fc
Baada ya mchezaji huyo kuitwa timu ya Taifa ya Ivory Coast, Kamwe amesema Yanga inasubiri taarifa ya madaktari wa timu ya Taifa baada ya mchezaji huyo kuhitajika kuitumikia Ivory Coast kwenye mechi mbili za Kimataifa za kirafiki dhidi ya Benin na Uruguay
