Mkwasa asihusishwe kuondoka kwa Lwandamina Yanga

Kuondoka kwa kocha Mkuu wa Yanga George Lwandamina kunatumiwa na baadhi ya vyombo vya habari 'kuvuruga' amani iliyopo katika uongozi wa Yanga.

Baadhi ya mitandao imemuhusisha Katibu Mkuu wa Yanga Charles Mkwasa kuwa chanzo cha Lowandamina kuondoka, jambo ambalo sidhani kama lina ukweli wowote.

Wanaosema kuwa sababu ni Mkwasa alitaka apewe jukumu la kuinoa Yanga sidhani kama wako sahihi kwa kuwa Mkwasa alikuwepo Yanga akiwa Katibu Mkuu kabla ya Lwandamina.

Kama alitaka nafasi ya ukocha angeweza kuipata wakati ule alipoachana na majukumu ya kuinoa timu ya Taifa lakini akaamua kukubali majukumu ya Ukatibu Mkuu.

Mkwasa ndio 'engine' ya Yanga kwa sasa. Akishirikiana na vingozi wengine, ndio wanaosukumu kufanya mabadiliko ili kuifanya Yanga iwe na nguvu ya kiuchumi.

Sio siri Yanga imekumbwa na changamoto nyingi, kama sio akina Mkwasa pengine Lwandamina angekuwa ameondoka muda mrefu sana.

Jambo jingine la msingi hapa ni lazima ifahamike kuwa mkataba wa kocha George Lwandamina kuifundisha Yanga unamalizika mwishoni mwa msimu kwa mujibu wa taarifa iliyotolewa na uongozi.

Hivyo kama Lwandamina ameamua kuondoka basi ni kwa utashi wake mwenyewe, hakutaka kuongeza mkataba mwingine.

Na hata taarifa iliyotolewa na ZESCO wakati wakimtangaza Lwandamina wamesema kocha huyo ataanza majukumu yake mwishoni mwa mwezi wa tano.

Hivyo nao wanafahamu bado ana mkataba na Yanga lakini kwa kuwa unaelekea ukingoni habanwi kusaini mkataba wa awali huko ZESCO.

Ninachofahamu kama ZESCO watahitaji huduma ya Lwandamina mapema zaidi ni lazima waje wamalizane na Yanga.

Kwa vyovyote lazima kuwe na makubaliano kati ya uongozi wa Yanga na ZESCO/Lwandamina ili kumruhusu aweze kuanza kuitumikia ZESCO sasa.