Stephane Aziz Ki jana alifunga bao lake la 18 msimu huu na kuendeleea kuweka hai dhamira yake ya kuibuka mfungaji bora wa ligi kuu ya NBC
Lilikuwa bao muhimu kwake hasa baada ya mshindani wake katika tuzo hiyo Feisal Salum kufunga mabao mawili katika ushindi wa mabao 5-1 ambao Azam Fc waliupata dhidi ya Kagera Sugar
Aziz Ki alifunga bao la tatu la Yanga katika dakika za lala salama akifunga bao hilo kwa kichwa ikiwa mara yake ya kwanza kufunga bao kwa kichwa tangu alipotua Yanga misimu miwili iliyopita
Sasa habari njema kwa Wananchi ni kuwa huenda wakaendelea kumshuhudia Aziz Ki katika uzi wa Yanga msimu ujao
Baada ya tetesi nyingi kuhusu hatma ya kiungo huyo wa ushambuliaji, Rais wa Yanga Injinia Hersi Said jana akatoa kauli yenye matumaini kwa Wananchi
Wakati akizungumza na mashabiki wa Yanga waliojitokeza kwa wingi uwanja wa Benjamin Mkapa katika shamrashamra za ubingwa wa 30, Hersi alisema Aziz Ki ataondoka pale atakapokuma amemaliza kazi iliyomleta Tanzania
"Aziz Ki bado yupo sana kwani hajamaliza kazi iliyomleta Tanzania. Ataondoka nchini pale atakapomaliza kazi hiyo," alisema Hersi na kuibua shwangwe kwa mashabiki
Aziz Ki mwenyewe aliwahi kutoa kauli kama hiyo kuwa kilichomleta Yanga ni kushinda makombe lengo likiwa Ligi ya mabingwa na kazi hiyo bado hajaitimiza hivyo pale atakapoisaidia Yanga kucheza fainali na hata kubeba taji la ligi ya mabingwa basi ndio ataondoka
