Msimu wake wa kwanza na Yanga umetosha kudhihirisha Miguel Gamondi ni Kocha wa daraja la juu na kama Wananchi wataendelea kuwa nae kwa muda mrefu pengine atafanya mambo makubwa
Wakati Yanga inamtangaza kuchukua nafasi ya Nasreddine Nabi katik Mkutano Mkuu wa Wanachama wa Yanga mwaka 2023, hakuna aliyekuwa akimfahamu vyema Kocha huyo zaidi ya Rais wa Yanga Injinia Hersi Said
Lakini msimu wake mmoja umetosha kuwasahaulisha Wananchi kuhusu Nabi ambaye nae anapambana kuipa ubingwa klabu ya FAR Rabat ya Morocco
Katika msimu huu, Gamondi amevuruga rekodi zote za msimu wa mwisho wa mtangulizi wake Nabi
Yanga imemaliza mechi zake 30 msimu huu ikijikusanyia pointi 80, na kuvunja rekodi ya msimu uliopita ilipomaliza ikiwa na pointi 78, hivyo msimu huu imezidi pointi mbili zaidi
Msimu huu, Yanga imemaliza ligi ikishinda michezo 26, hivyo kuvunja rekodi ya msimu uliopita iliposhinda michezo 25, ambapo imezidi mchezo mmoja mbele
Mabingwa hao msimu huu wameongeza idadi ya mabao 10 zaidi ya msimu uliopita, kwani wamepachika mabao 71, wakivunja rekodi ya msimu uliopita, walipomaliza na mabao yao 61, huku pia ikiruhusu idadi ndogo ya mabao ambayo ni 14 tu, wakati msimu uliopita iliruhusu mabao 18, hivyo kuwa pungufu ya mabao manne msimu huu
Rekodi nyingine ya kujivunia kwa Yanga msimu huu ni kushinda mechi zake zote 15 nyumbani, huku ikipata sare mechi tatu ugenini na kupoteza mechi mbili
Kimataifa Yanga imecheza hatua ya makundi ya ligi ya mabingwa kwa mara ya kwanza baada ya kusubiri miaka 25 na zaidi ni kufika robo fainali ya michuano hiyo na kutolewa kwa 'zengwe' nchini Afrika Kusini
Msimu uliopita Nabi aliiwezesha Yanga kucheza fainali ya kombe la Shirikisho na kukosa ubingwa kwa kanuni ya bao la ugenini baada ya sare ya mabao 2-2 dhidi ya USM Alger
