Mwenyekiti wa Baraza la wadhamini la Yanga, George Mkuchika ameitaka Kamati ya usajili iwe makini kwenye kufanya usajili wa wachezaji ili waendelee kufanya vema msimu ujao wa Ligi Kuu na michuano ya Kimataifa
Akizungumza katika Mkutano Mkuu wa Wanachama wa Yanga uliofanyika Ukumbi wa Kimataifa wa Mikutano Julius Nyerere jana, Mkuchika alisema baada ya mafanikio ya soka la ndani katika misimu mitatu, sasa kiu yao ni kuona timu inaendelea kufanya vizuri zaidi hasa katika mashindano ya CAF
Mkuchika alisema Wanayanga wanataka kuiona Yanga ikicheza fainali ya ligi ya mabingwa kama walivyofanya katika kombe la Shirikisho msimu wa 2022/23
"Tunataka mfanye usajili wa kutisha ambao utatufanya tuingie hatua ya fainali katika mashindano ya Ligi ya Mabingwa Afrika na kulibeba Kombe moja kwa moja mpaka kwa Rais Samia"
"Hatupaswi kubweteka kwa mafanikio haya, tufahamu kazi ndio kwanza imeanza, Baraza la Wadhamini tutaendelea kushirikiana na uongozi wa klabu ili kutetea makombe yetu yote msimu ujao," alisema
Aidha Mkuchika aliwataka mashabiki wa Yanga kuendelea kuiunga mkono timu yao kwa kwenda kiwanjani timu hiyo inapocheza
"Tunawaomba mashabiki wa Yanga nanyi msiwe nyuma, hakikisheni mnakwenda uwanjani kujaza uwanja kila timu inapocheza," aliongeza Mkuchika
