Meneja wa Habari na Mawasiliano klabu ya Yanga Ali Kamwe amesema wako kwenye mazungumzo ya mwisho na timu watakayochuana nayo katika mchezo wa kilele cha Wiki ya Mwananchi ambao utapigwa August 04 katika uwanja wa Benjamin Mkapa
Kamwe amesema awali walikuwa wakifkiri kuleta timu kutoka barani Ulaya lakini sasa wamesitisha mpango huo baada ya kupata timu yenye sifa wanazohitaji hapa barani Afrika
"Unajua tulizialika timu kadhaa kubwa lakini wengi wamehofia kukutana nasi isipokuwa huyu mmoja ambaye tunakamilisha nae maungumzo"
"Ni timu kubwa ambayo imewahi kutwaa taji la Ligi ya Mabingwa, hawa watakuja kwa Mkapa tuonyeshane kazi August 04"
"Msimu huu tumeweka malengo makubwa, tunataka ubingwa wa Afrika, ndio maana unaona hata maandalizi yetu ni tofauti, tunacheza na timu kubwa tu"
"Mechi zetu sisi wapinzani wanafahamika, na hatuchezi gizani kama timu nyingine," Kamwe aliwatupia dongo watani zake Simba
Kabla ya kurejea nchini kwa ajili ya Wiki ya Mwananchi, Yanga itacheza mechi mbili Afrika Kusini
Kesho Jumatano wataumana na TS Galaxy mchezo ambao utarushwa mbashara na Azam TV na kuhitimisha mchezo wa mwisho Jumapili Julai 28 dhidi ya Kaizer Chiefs katika Toyota Cup
