Rais wa Yanga Injinia Hersi Said amesema anaamini nyota wapya waliosajiliwa katika dirisha la usajili lililofungwa jana watakuwa na mchango mkubwa msimu huu
Hersi amesema anaamini uzoefu na ubora wa wachezaji kama Clatous Chama, Prince Dube, Duke Abuya, Chadrack Boka na wengine utakuwa na faida kubwa kwa timu hiyo
Aidha Hersi amewapa ujumbe wale wanaodai Chama amezeeka, wasubiri kuona mchango wake katika kikosi cha Yanga msimu huu
"Chama ni moja ya wachezaji bora waliofanya vyema katika ligi kuu ya Tanzania Bara misimu ya karibuni. Huyu ni mchezaji wa daraja la juu isiwe kwa kuwa Yanga imemsajili aonekane ni mchezaji wa kawaida"
"Nikwambie tu, haikuwa rahisi kumsajili Chama kwani hata huko alikotoka hawakuwa tayari kuona anaondoka. Chama ni mchezaji mwenye uzoefu mkubwa, tusubiri mwisho wa msimu halafu utauona mchango wa Chama kwa Yanga," Hersi aliiambia BBC Swahili
Aidha Hersi pia amesema mshambuliaji Prince Dube ameanza vyema majukumu yake katika kikosi cha Yanga na ana imani msimu huu atafunga zaidi ya mabao 20
"Mpaka sasa katika mechi hizi tulizocheza Dube amehusika katika mabao zaidi ya matano, akiwa amefunga mabao matatu. Huyu ni mshambuliaji hatari ambaye ana umahiri wa kipekee katika kufunga mabao"
"Kwa jinsi timu yetu inavyocheza na kutengeneza nafasi, kama Dube atafunga chini ya mabao 20 msimu huu basi atakuwa amefeli," aliongeza Hersi
