Yanga imedhamiria kucheza mechi ya mkondo wa pili raundi ya kwanza michuano ya ligi ya mabingwa dhidi ya CBE katika uwanja wa New Amaan Complex, visiwani Zanzibar
Uwanja wa New Amaan Complex umeidhinishwa na CAF kutumika kwa ajili ya mechi za Kimataifa ikiwa ni pamoja na michuano ya ligi ya mabingwa barani Afrika
Msemaji wa ZFF Spesho Kabwanga amesema uwanja huo awali ulizuiwa kwa kuwa haukukidhi baadhi ya vigezo vya CAF lakini baada ya kufanyiwa marekebisho muhimu, uwanja huo umeruhusiwa kutumika
"Uwanja wa New Amaan Complex umekidhi vigezo vya CAF na tayari umepata ruksa ya kutumika katika mechi za Kimataifa. Kuna vigezo na masharti ambayo CAF walitupatia kuhakikisha tunakidhi kabla ya uwanja kupitishwa"
"Tulifanya marekebisho na kuzingatia vigezo walivyotupatia na tukawatumia uthibitisho wa kila maboresho yaliyofanyika na sasa uwanja tayari umeruhusiwa kutumika," alisema Kabwanga
Kabwanga ametoa ufafanuzi huo na kukanusha taarifa zinazoripotiwa na baadhi ya vyombo vya habari kuwa uwanja huo haujakidhi vigezo vya CAF na ndio sababu hauko miongoni mwa orodha ya viwanja vilivyoidhinishwa na CAF kutumika katika michuano ya ligi ya mabingwa na kombe la Shirikisho msimu huu
Yanga itachuana na CBE ya Ethiopia katika mechi za raundi ya kwanza kuwania tiketi ya kutinga hatua ya makundi ya CAF CL
Mchezo wa kwanza utapigwa Ethiopia katika dimba la Abebe Bikila Septemba 13-15 na marudiano kupigwa Tanzania Septemba 20-22
Huenda mechi hiyo ya marudiano ikapigwa uwanja wa New Amaan Complex..
