Kocha Mkuu wa Yanga Miguel Gamondi amekosoa utaratibu wa Shirikisho la soka barani Afrika (CAF) katika ratiba ya mashindano ya CAF ngazi ya klabu na timu za Taifa
Kwa sasa ligi mbalimbali zimesimama Afrika ili kupisha ratiba ya kuwania kufuzu michuano ya Afcon 2025 kwa timu za Taifa na punde itafuatiwa na ratiba ya CAF kwa klabu
Utaratibu huu umekuwa ukiziumiza klabu zinazoshiriki michuano ya CAF hasa zile zinazotoa wachezaji wengi katika timu za Taifa
"Mimi sikubaliani na utaratibu huu wa ratiba za mashindano ya CAF (klabu na timu za Taifa) kufuatana kwa ukaribu"
"Mfano sisi Yanga tunapaswa kucheza Septemba 13 Ethiopia wakati mechi za timu za Taifa zitahitimishwa Septemba 10, kwa wachezaji wetu ambao wanakwenda timu za Taifa maana yake hawatakuwa na muda wa mapumziko kwa sababu wakitoka timu za Taifa pengine watalazimika kusafiri moja kwa moja kuelekea Ethiopia"
"Tuna wachezaji 14 ambao wameitwa timu za Taifa hivyo, ni ratiba ambayo inasababisha changamoto kwa klabu kwa sababu wachezaji watalazimika kusafiri muda mrefu," alisema Gamondi
Mazingira kama haya yalitokea kwa Yanga msimu uliopita wakati ilipokwenda Algeria kucheza mechi ya kwanza ya hatua ya makundi ligi ya mabingwa dhidi ya CR Belouizdad na kupoteza mchezo kwa kufungwa mabao 3-0
Katika mchezo huo mlinda lango Djiguo Diarra alishindwa kuungana na timu Algeria baada ya changamoto ya kusafiri pale alipomaliza majukumu ya timu ya Taifa huku Stephane Aziz Ki akitua Algeria usiku wa kuamkia siku ya mchezo
Yanga ina wachezaji 14 ambao wako kwenye majukumu ya timu za Taifa na pengine baadhi yao watalazimika kusafiri moja kwa moja Ethiopia baada ya mechi za timu za Taifa kukamilika
Djigui Diarra, Aboutwalib Mshery, Nickson Kibabage, Dickson Job, Ibrahim Bacca, Bakari Nondo Mwamnyeto na Mudathir Yahya
Wengine ni Khalid Aucho, Duke Abuya, Stephane Aziz Ki, Clatous Chama, Kennedy Musonda, Prince Dube na Clement Mzize
