Meneja wa Habari na Mawasiliano wa Yanga Ali Kamwe ametangaza ratiba ya mabingwa hao wa nchi kuelekea mchezo wa mkondo wa pili kuwania kufuzu hatua ya makundi ligi ya mabingwa barani Afrika dhidi ya CBE SA
Mchezo huo utapigwa Jumamosi, Septemba 21 katika uwanja wa New Amaan Complex, Zanzibar, saa 2:30 usiku
Kamwe amesema baada ya timu kurejea kutoka Ethiopia, wameanza maandalizi kuelekea mchezo huo, kikosi kikitarajiwa kuelekea Zanzibar siku ya Alhamisi asubuhi
"Tayari tumeanza maandalizi yetu kuelekea mchezo dhidi ya CBE SA ambao utapigwa uwanja wa New Amaan Complex. Timu itaelekea Zanzibar siku ya Alhamisi, tutaondoka Dar es salaam na boti ya saa 3 asubuhi"
"Tutakuwa na siku mbili za kufanya mazoezi hapa Zanzibar kabla ya Jumamosi ambayo ni siku ya mchezo"
"Siku ya Ijumaa tutafanya dua maalum hapa Zanzibar kuiombea timu yetu, viongozi na mashabiki pamoja na kuwaombea ndugu zetu waliotangulia mbele ya haki"
"Tayari mauzo ya tiketi kuelekea mchezo huo yameanza, tunawaomba mashabiki wetu hapa Zanzibar na wale watakaosafiri kutoka mikoa mbalimbali kununua tiketi zao mapema," alisema Kamwe
