Meneja wa Habari na Mawasiliano wa Yanga Ali Kamwe amesema wako mkoani Mbeya kwa kazi moja tu, kuhakikisha wanavuna alama zote tatu mkakati ukiwa kushinda mechi zote za viporo ili kukaa kileleni mwa msimamo wa ligi
Kesho Jumatano Yanga watakuwa wageni wa Ken Gold katika mchezo utakaopigwa uwanja wa Sokoine, saa 10 jioni
Licha ya Ken Gold kuburuza mkia katika msimamo wa ligi wakiwa wamepoteza mechi zote nne walizocheza mpaka sasa, Kamwe amesema timu hiyo sio dhaifu kama inavyoonekana na hawatawadharau
"Sisi tuko hapa kwa lengo moja tu, kusaka ushindi ili tuhakikishe tunakwenda pale juu kwenye msimamo wa ligi"
"Unajua kwa sasa ni ngumu kumueleza mtu ambaye yuko nje ya Tanzania kuwa ligi inaendelea hapa kwa sababu Yanga haipo kileleni. Hao wanaoshikilia nafasi ya kwanza hawafahamiki popote na hata wao wanajua wamekaa sehemu ambayo sio yao"
"Tunataka kushinda mechi zetu ili tuhakikishe tunakwenda kukaa katika nafasi yetu, msimu huu pia tumeweka malengo ya kushangilia ubingwa wa ligi kuu kwa mara ya nne mfululizo"
"Ken Gold tumeona mechi zao sio timu dhaifu, ila unaweza kusema walikosa bahati katika baadhi ya mechi ambazo walipoteza hivyo sisi hatuwadharau," alisema Kamwe
Kikosi cha Yanga kilitua mkoani Mbeya jana na leo jioni watafanya mazoezi ya mwisho katika uwanja wa Sokoine
