Mabingwa wa liigi kuu ya Tanzania Bara kwa misimu mitatu mfululizo Yanga leo wanarejea katika mikiki mikiki ya ligi baada ya kutimiza majukumu ya Kimataifa kwa kufuzu hatua ya makundi ya ligi ya mabingwa barani Afrika
Yanga iko mkoani Mbeya kuikabili Ken Gold katika mchezo utakaopigwa uwanja wa Sokoine, saa 10 jioni
Huu utakuwa mchezo wa pili wa ligi kwa Yanga msimu huu baada ya ushindi wa mabao 2-0 dhidi ya Kagera Sugar katika mchezo wa kwanza
Ni mchezo utakaozikutanisha timu mbili zenye malengo tofauti. Yanga inasaka ushindi ili kusogea juu katika msimamo wa ligi wakati Ken Gold bado wanasaka ushindi wao wa kwanza msimu huu
Ken Gold wako chini kabisa ya msimamo wa ligi wakipoteza mechi zote nne walizocheza. Pengine leo watajaribu kuzinduka mbele ya mabingwa watetezi
Kocha Mkuu wa Yanga Miguel Gamondi jana alisema hawaidharau Ken Gold kwani anatambua kila timu inayocheza na Yanga hupambana zaidi kusaka matokeo mazuri
Alisema hata kama Ken Gold walipoteza mechi zote zilizopita, mechi dhidi ya Yanga watakuwa tofauti na hivyo wachezaji wake ni lazima wapambane ili kushinda mchezo huo
Yanga ilitua Mbeya juzi na jana wakapata nafasi ya kufanya mazoezi ya mwisho katika uwanja wa Sokoine ambao mchezo huo utapigwa
