Kocha Mkuu wa Yanga Princess Edna Lema amesema hawana hofu yoyote kuelekea mchezo wa nusu fainali Ngao ya Jamii dhidi ya Simba Queens utakaopigwa kesho Jumatano katika uwanja wa KMC
Akizungumza na Waandishi wa habari kuelekea mchezo huo mapema leo, Lema alisema wanawaheshimu Simba Queens kwa kuwa wana tmu nzuri iliyokuwa pamoja kwa muda mrefu lakini hawawaogopi
Lema amesema kikosi chake kimekuwa na maandalizi mazuri kuelekea mchezo huo wakiwa na lengo la kushinda ili kutinga fainali na kutwaa Ngao ya Jamii
"Kama timu tumejiandaa vizuri, naamini utakuwa mchezo mgumu kwa timu zote kwani inakutanisha timu kubwa. Nawaheshimu Simba ni timu nzuri lakini hatuhofii kwani nasi tuna timu mpya ambayo imesheheni wachezaji wazuri sana"
"Matumaini ya kubeba ubingwa wa Ngao ya Jamii ni makubwa kwetu. Tukibeba ubingwa huu itatupa taswira ya kuanza msimu vizuri. Matarajio yetu mwaka huu ni kuwa mabingwa, unapopata mchezo mgumu kama huu unakujenga na kukupa majibu sahihi ya uimara wa timu yako”
"Tumeongeza wachezaji wengi wakigeni ambao ni wazuri sana. Lengo letu ni kuongeza ushindani ndani ya kikosi na upinzani wa kutosha dhidi ya washindani wetu. Naamini vijana hawa wapya watatupa ladha tofauti kuelekea mchezo wetu wa Derby"
"Wachezaji wangu hawana hofu, sisi hatuna hofu, uwezo wa kuonesha ubora wetu tunao. Tunaheshimu wapinzani wote ambao wapo kwenye mashindano haya ya ngao ya jamii. Binafsi niwe muwazi nilikuwa naitaka hii mechi ya Simba ili kupima ubora wangu. Ukitaka kujua ubora wako unapaswa kucheza na timu kubwa ili ujue uimara na mapungufu yako," alisema Lema
