Kazini kwa Ramovic kuna kazi

Kocha Mkuu wa Yanga Sead Ramovic kwa sasa anazongwa na kulaumiwa kufuatia mwenendo mbaya wa kikosi chake katika michuano ya ligi ya mabingwa

Jana Ramovic alipoteza mechi yake ya pili mfululizo katika michuano hiyo baada ya Yanga kufungwa mabao 2-0 na MC Alger

Ni matokeo ambayo yamewakatisha tamaa Wananchi lakini kocha huyo raia wa Ujerumani anaamini timu yake bado ina nafasi ya kurejea katika ubora na kufanya vizuri katika mechi zitakazofuata

Ramovic anakabiliwa na kazi ngumu ya kubadili upepo ndani ya muda mfupi, anachohitaji ni uungwaji mkono tu kwani hakuna muujiza ambao utaitoa Yanga hapa ilipo zaidi ya kazi kufanyika katika uwanja wa mazoezi

Ramovic alikabidhiwa Yanga ikiwa 'imechoka' bahati mbaya kwake hakupata muda wa kutosha kukiandaa kikosi baada ya Miguel Gamondi kufutwa kazi

Mbaya zaidi kikosi chake kimecheza mechi za Kimataifa kikiwakosa baadhi ya wachezaji muhimu

Khalid Aucho, Clement Mzize, Chadrack Boka na Dickson Job jana hawakuwa sehemu ya mchezo dhidi ya MC Alger kutokana na changamoto zinazowakabili

Aucho, Boka na Mzize wamekosa mechi zote tatu ambazo Ramovic ameiongoza Yanga mpaka sasa

Pengine ataweza kuwatumia nyota hao katika mchezo unaofuata dhidi ya TP Mazembe baada ya afya zao kuimarika

Ramovic pia ana kazi ya kuimarisha viwango vya baadhi ya wachezaji ambao msimu huu hawaonekani kuwa katika ubora

Stephane Aziz Ki alikuwa injini ya mabao ya Yanga msimu uliopita lakini iko wazi msimu huu hajaonyesha hata robo ya kile alichofanya msimu uliopita

Prince Dube nae hajafikia matarajio ya wengi katika eneo la ushambuliaji huku Jean Baleke akishindwa kuonyesha ushawishi katika kiwanja cha mazoezi

Ni kama Ramovic amemuondoa Baleke katika mipango yake na huenda nyota huyo akarejeshwa katika klabu yake ya TP Mazembe pale dirisha dogo la usajili litakapofunguliwa