Katika mchezo uliopita wa ligi ya mabingwa dhidi ya MC Alger, kiungo mshambuliaji Clatous Chama aliingia kipindi cha pili kuchukua nafasi ya Stephane Aziz Ki ambaye ni sahihi kusema bado 'gari halijawaka' msimu huu
Kuingia kwa Chama na baadae Prince Dube kulileta mabadiliko katika eneo la ushambuliaji ambapo katika dakika 10 za mwisho Yanga ilicheza vizuri zaidi na pengine Chama angeweza kufunga moja ya nafasi adimu na hata kusababisha mkwaju wa penati katika majaribio yake kadhaa kama waamuzi wangekuwa makini
Chama pia alibadili kasi ya mchezo alipoingia mechi ya ligi kuu dhidi ya Namungo Fc na alitoa pasi ya bao la pili lililofungwa na Pacome Zouzoua
Chama ni kama amemtumia ujumbe kocha mkuu wa Yanga Sead Ramovic kuwa anastahili kuanza katika kikosi chake
Kwa sasa Chama anaonekana kuwa katika kiwango bora pengine kuliko hata Aziz Ki ambaye ana kazi ya kufanya kurejea katika ubora alioonyesha msimu uliopita
Lakini pia Chama ameonyesha kuwa na maelewewano mazuri ya kiuchezaji anapocheza na Pacome Zouzoua
Ukiacha mechi dhidi ya Namungo, mechi nyingine ambao wawili hao walishirikiana vyema ilikuwa dhidi ya Pamba Jiji mchezo ambao Yanga iliibuka na ushindi wa mabao 4-0
Katika mchezo huo Chama alitengeneza bao lililofungwa na Pacome huku pia mwenyewe akifunga bao kupitia mpira wa faulo
Mabao matatu aliyofunga Pacome kwenye ligi msimu huu, mawili yamepita katika mguu wa Mwamba wa Lusaka
Kwa kiwango alichoonyesha Chama katika mechi za karibuni, haitashangaza kama Ramovic atamuanzisha katika mchezo unaofuata dhidi ya TP Mazembe utakaopigwa Lubumbashi Jumamosi ya wiki hii
