Baada ya kukamilisha mechi ya raundi ya tatu ligi ya mabingwa dhidi ya TP Mazembe na kupata alama moja muhimu ugenini, matokeo ya sare ya bao 1-1, Yanga imeiweka TP Mazembe kiporo na sasa inaelekeza nguvu zake katika mechi nne za ligi kuu zitakazopigwa ndani ya siku 10
Alhamisi Disemba 19 Yanga itashuka uwanja wa KMC Complex kuikabili Mashujaa Fc. Huu utakuwa mchezo wa kwanza kwa Yanga katika uwanja wake mpya wa nyumbani, KMC Complex
Siku tatu baadae, Disemba 22 Yanga itarudi tena KMC Complex kumenyana na Tanzania Prisons kabla ya kusafiri mkoani Dodoma kuikabili Dodoma Jiji Disemba 25 katika uwanja wa Jamhuri
Disemba 29 Yanga itarejea tena KMC Complex kuhitimisha mwaka 2024 kwa mchezo dhidi ya Kagera Sugar
Meneja wa Habari na Mawasiliano wa Yanga Ali Kamwe amesema wanahitaji kuvuna alama 12 katika mechi hizo lengo likiwa kurudi kileleni mwa msimamo wa ligi
Kamwe ameongeza kuwa mechi hizo pia watazitumia kama sehemu ya maandalizi kuelekea mchezo wa raundi ya nne hatua ya makundi CAF CL dhidi ya TP Mazembe ambao utapigwa Januari 03 2025 katika uwanja wa Benjamin Mkapa
