Mabingwa wa soka Tanzania Bara Yanga leo wako uwanja wa KMC Complex kuikabili Mashujaa Fc katika mchezo wa ligi kuu ya NBC
Itakuwa mechi ya kwanza kwa Yanga kucheza katika dimba la KMC Complex wakiwa wamehama kutoka Azam Complex
Lakini pia itakuwa mechi ya pili ya ligi kwa kocha Saed Ramovic ambaye mechi yake ya kwanza ilikuwa dhidi ya Namungo Fc mchezo ambao Yanga ilishinda mabao 2-0
Baada ya kupoteza mechi mbili mfululizo katika uwanja wa nyumbani, Yanga hawapaswi kudondosha alama zaidi nyumbani ili kuhakikisha wanabaki katika malengo ya kutetea ubingwa kwa msimu wa nne mfululizo
Ni wazi hautakuwa mchezo mwepesi kwani Mashuja Fc ni miongoni mwa timu ngumu msimu huu ikipata matokeo mazuri inapocheza nyumbani au ugenini
Baada ya Yanga kuyumba katika mechi chache zilizopita, mwenendo huo ni kama umeondoa woga kwa timu pinzani na haishangazi kuona hata Mashujaa Fc kupitia kurasa zao za mitandao ya kijamii tambo zimetawala kuelekea mchezo huo
Wachezaji wa Yanga leo wanapaswa kuhakikisha alama tatu zinamilikiwa na Wananchi lakini pia kuonyesha kandanda safi ambalo litarejesha heshima ya Yanga mitaani na kuwaziba midomo 'wachambuzi wa mchongo' ambao kula yao ni Yanga inapofanya vibaya
