Meneja wa Habari na Mawasiliano klabu ya Yanga Ali Kamwe amesema hatma yao ya kufuzu robo fainali ya michuano ya ligi ya mabingwa barani Afrika imeshikiliwa na mechi mbili zilizobaki wakianza na mchezo dhidi ya Al Hilal
Kamwe amesema kuwa inabidi waende Mauritania kwa tahadhari na kucheza mechi kwa mahesabu makubwa kutokana na ugumu na umuhimu wa mchezo huo ambao kwao hauhitaji chochote zaidi ya ushindi
"Tunakwenda huko kwa ajili ya kusaka pointi tatu tu na si vinginevyo, tutakwenda kucheza kwa tahadhari kubwa kulingana na ubora wa mpinzani wetu"
"Hatutakwenda kufunguka sana kwa sababu Al Hilal ni timu yenye ubora zaidi linapokuja suala la mashambulizi ya kushtukiza, ni mechi ngumu ambayo inabidi twende kucheza kwa mahesabu makali kwani hatuna tunachohitaji zaidi ya ushindi"
"Tukipata pointi tatu basi tutakuwa na matumaini kwa sababu mechi yetu ya mwisho dhidi ya MC Alger tutacheza tukiwa nyumbani," alisema Kamwe
Kikosi cha Yanga kinatarajiwa kuondoka nchini Alfajiri ya kesho Alhamisi kuelekea Mauritania tayari kwa mchezo huo huku Wananchi wakiwa na kumbukumbu ya kufungwa mabao 2-0 katika mchezo wa kwanza uliopigwa uwanja wa Benjamin Mkapa
Al Hilal wana historia ya kuisumbua Yanga kila timu hizo zilipokutana ambapo Yanga haijapata ushindi dhidi yao katika mechi tatu za mwisho
Yanga inahitaji kushinda mechi inayofuata ili kuweka hai matumaini ya kufuzu robo fainali
