Misimu miwili nyuma Yanga ilicheza fainali ya kombe la Shirikisho (CAF CC) na kukosa ubingwa kwa mujibu wa kanuni baada ya sare ya mabao 2-2 dhidi ya USM Alger
Haya ni mafanikio makubwa zaidi ambayo Yanga wameyapa katika soka la Afrika katika kipindi cha miaka 20 iliyopita. Ni sahihi kusema Yanga ndio timu iliyofanikiwa zaidi kutoka Tanzania katika mashindano ya CAF katika kipindi hicho kwani wananchi wanayo medali ya mshindi wa pili kabatini
Msimu uliopita Wananchi wakafanikiwa kucheza robo fainali ya ligi ya mabingwa, pengine ulikuwa msimu ambao Yanga ingeweza kucheza nusu fainali kama sio kile walichofanyiwa Afrika Kusini katika mchezo dhidi ya Mamelodi Sundowns
Ni bahati mbaya msimu huu Yanga haikufikia kile walichofanya katika misimu miwili iliyopita, timu ikiondoshwa katika hatua ya makundi ligi ya mabingwa
Msimu huu Yanga iliweka malengo makubwa zaidi ya kufanya vizuri lakini unaweza kusema mwanzo mbaya katika mechi mbili za awali ulivuruga mipango ya Wananchi mapema
Kuna kazi kubwa imefanyika na benchi la ufundi chini ya kocha Sead Ramovic hadi timu kumaliza katika nafasi ya tatu kundi A ikikusanya alama 8
Licha ya kuanza vibaya, Yanga imefikia idadi ya alama ambazo walikusanya msimu uliopita na kufuzu robo fainali lakini hazikutosha msimu huu
Hichi kilichotokea msimu huu kinakwenda kutengeneza 'njaa' mpya ya mafanikio na tutarajie kuona Yanga ikiimarika na kuwa bora zaidi msimu ujao
Kwa sasa mkakati ni kuhakikisha ufalme wa ndani haupotei, ni lazima kutetea mataji yote ambayo Yanga inayashikilia yaani ligi kuu ya kombe la FA kwani tayari Ngao ya Jamii iko mikononi
