Kesho Jumamosi, Januari 25 Yanga inaanza kampeni ya kutetea kombe la CRDB kwa mchezo dhidi ya Copco Fc ya Mwanza
Mchezo huo wa hatua ya 64 bora, utapigwa katika uwanja wa KMC Complex, saa 10 jioni
Kocha Mkuu wa Yanga Sead Ramovic amesema dhamira yake ni kuona anarejesha kombe hilo Jangwani kwa msimu wa nne mfululizo
Akizungumza katika Mkutano na Wanahabari kuelekea mchezo huo, Ramovic alisema wachezaji wake wote wako tayari kwa mchezo huo wa kwanza kwa kikosi chake baada ya kuondoshwa katika michuano ya ligi ya mabingwa barani Afrika (CAF CL)
"Tumekuwa na wakati mzuri wa kujiandaa na mchezo dhidi ya Copco Fc, tunahitaji kushinda ili tusonge mbele raundi inayofuata. Malengo yetu ni kutetea taji hili"
"Timu yetu ina kikosi bora cha wachezaji 25, wote wako tayari kwa mechi hii," alisema Ramovic
Yanga ndio mabingwa watetezi wa kombe la FA kwa misimu mitatu mfululizo ambapo katika misimu miwili iliyopita walilitwaa kwa kuifunga Azam Fc katika mechi za fainali
Msimu wa 2021/22 waliichapa Coastal Union katika mchezo wa fainali
