Baada ya kukamilisha mchezo wa hatua ya 32 bora kombe la Shirikisho la CRDB kwa ushindi wa mabao 3-1 dhidi ya Coastal Union jana, Kocha Mkuu wa Yanga Miloud Hamdi ametoa mapumziko ya siku 6 kwa wachezaji
Meneja wa Habari na Mawasiliano wa Yanga Ali Kamwe amesema wakati huu ambao ligi inasimama kupisha kalenda ya FIFA, wachezaji ambao hawatakuwa katika majukumu ya timu za Taifa watanufaika na mapumziko hayo na watakaporejea watakuwa na kazi ya kuhitimisha mechi zilizosalia ligi kuu na kombe la CRDB
"Klabu imetoa mapumziko ya siku sita kwa wachezaji wetu. Lengo ni kuwapa nafasi ya kujiandaa"
"Tumebakiwa na michezo migumu sana. Kila mechi ngumu kwa sababu watu ndio wanaelekea kufunga biashara. Kuna wanaoshuka, kuna wanaotaka nafasi za juu. Kila mtu anapambania malengo yake," alisema Kamwe
Katika hatua nyingine, Kamwe amesema klabu ya Yanga imeandaa tukio maalum la Iftar ambapo imewaalika wadau mbalimbali wa soka nchini kujumuika pamoja
"Yanga tumeandaa Iftari kwa wadau wetu na washirika wetu mbalimbali. Tumewaalika TFF, Bodi ya ligi (TPLB), waamuzi pamoja na vilabu vingine vya ligi kuu. Nimemualika Ahmed Ally na amenijibu atakuja na watu wawili ambao ni Steven Mguto na Almasi Kasongo," alisema Kamwe
