Kwa takribani miezi miwili, Wananchi hawajamshuhudia beki wao mahiri upande wa kulia Yao Kouassi ambaye majeraha yamemuandama msimu huu
Baada ya upasuaji wa goti, Yao amepona na sasa ameanza mazoezi ya kurejesha utimamu wa mwili
Meneja wa Yanga Walter Harrison amesema Yao anaendelea kuimarika siku hadi siku, ni suala la muda tu Wananchi watamuona tena uwanjani
"Yao amepona majeraha, kama mnavyomuona ameanza program maalum ya mazoezi ili kurejesha utimamu wake wa mwili"
"Ni matarajio yetu, atakuwa sawa haraka na kurejea katika majukumu yake," alisema Walter
Yanga ililazimika kumsajili Israel Mwenda baada ya Yao kuumia huku kukiwa na hofu ya kumkosa kwa muda mrefu
Urejeo wake unakwenda kuongeza ushindani zaidi katika safu ya ulinzi upande wa kulia kwani wakati huu Mwenda anaonekana kufanya vizuri akimuweka nje Kibwana Shomari ambaye alirejea kikosini baada ya Yao kuumia
