Baada ya mapumziko ya takribani wiki tatu, mikiki mikiki ya ligi kuu ya NBC inarejea leo ambapo mabingwa watetezi Yanga wako mkoani Tabora kuikabili Tabora United
Ni mechi iliyozungumzwa zaidi, vita ya maneno ikisikika nje ya uwanja kila timu ikijinasibu kuibuka na ushindi
Yanga ilitua Tabora jana na jioni vijana wa Miloud Hamdi wakafanya mazoezi yao ya mwisho katika uwanja wa Ali Hassan Mwinyi
Wananchi wamepania kushinda mchezo huo ili kulipa kisasi baada ya kupoteza mechi ya duru ya kwanza kwa kufungwa mabao 3-1
Mji wa Tabora kwa siku mbili umezizima kwa shangwe la mashabiki wa Yanga, ni wazi leo uwanja wa Ali Hassan Mwinyi hautatosha kwa wingi wa mashabiki ambao wanatarajiwa kujitokeza
Licha ya Yanga kuwa ugenini, ndio inayoonekana kama iko nyumbani huku wenyeji wakikerwa na ufalme huo unao-onyeshwa na Wananchi
Mchezo unatarajiwa kupigwa saa 10 jioni
