Kocha Mkuu wa Yanga Miloud Hamdi amesema ilikuwa muhimu kwa kikosi chake kupata ushindi katika mchezo wa ligi kuu dhidi ya Coastal Union, amefurahi kwa kuwa wamelifanikisha
Hata hivyo Hamdi amesema walistahili kupata ushindi mnono zaidi katika mchezo huo walioshinda bao 1-0 lakini pengine walikosa umakini katika eneo la mwisho
Hamdi ambaye tangu alipotua Yanga hajapoteza mchezo wowote, amesema Alhamisi wanakabiliwa na mchezo mgumu dhidi ya Azam Fc, hivyo ushindi huo unawafanya waende kwenye mchezo huo wakiwa na fikra chanya zaidi
"Ilikuwa muhimu kwetu kupata ushindi leo hivyo nafurahi tumefanikiwa ingawa tungeweza kufanya vizuri zaidi"
"Tulipata nafasi sita za kufunga mabao, nafahamu mashabiki wetu wanafurahi tukifunga mabao mengi lakini kwa leo niseme tunapaswa kufurahi kwa kuwa tumeshinda"
"Tumecheza mechi hii tukitoka kwenye mechi ngumu dhidi ya Tabora United na ndani ya muda wa siku mbili tunakabiliwa na mechi nyingine ngumu dhidi ya Azam Fc"
"Tuko juu katika msimamo wa ligi hivyo tunapaswa kuendelea kufanya vizuri katika kila mechi ili tuweze kufikia malengo yetu," alisema Hamdi
Yanga ina siku mbili za kukamilisha maandalizi yake kabla ya kuikabili Azam Fc katika mchezo utakaopigwa Alhamisi, April 10 katika uwanja wa Azam Complex
