Wakati msimu wa ligi kuu 2024/25 ukielekea ukingoni, Yanga tayari inayo tiketi ya kushiriki michuano ya ligi ya mabingwa (CAF CL) 2025/26
Alama 70 kileleni mwa msimamo wa ligi, Yanga imejihakikishia kumaliza msimu katika nafasi mbili za juu naa hivyo moja kwa moja kukata tiketi ya kushiriki michuano hiyo
Meneja wa Habari na Mawasiliano wa Yanga Ali Kamwe, amefichua kuwa baada ya kile kilichotokea msimu huu, wameanza michakato ya maboresho ya kikosi mapema ili kuhakikisha msimu ujao wanakuwa na timu bora itakayofanya vizuri zaidi
Kamwe amesema hatua ya kwanza uongozi unafanyia kazi mapendekezo ya benchi la ufundi kwa kuwaongezea mikataba wachezaji ambao mikataba yao inaelekea ukingoni lakini wako katika mipango ya Mwalimu
Lakini pia tayari maskauti wako sokoni kusaka wachezaji wapya ambao watasajiliwa
"Tumeanza kuboresha timu yetu kwa ajili ya msimu ujao, maboresho ya kwanza ni kubakisha nyota tulionao kwa mujibu wa ripoti ya mwalimu, wale ambao watataka kuondoka, tutaangalia kwa maslahi ya klabu nani tumuondoe, lakini malengo makubwa ni kutengeneza timu ya msimu ujao kwa sababu tayari tuna tiketi ya kushiriki Ligi ya Mabingwa"
"Wachezaji bora wengi lazima uanze kuwatafuta mapema, kama mchezaji yupo huru maana yake mkataba wake unaelekea kumalizika na yule mwenye mkataba mazungumzo na klabu yake yanaanza kipindi hiki," alisema Kamwe
Baada ya misimu miwili ya kucheza fainali ya CAF CC na robo fainali ya CAF CL, msimu huu Yanga iliishia hatua ya makundi
