Katika misimu ya nyuma, kanuni zilizotumika kupata timu zilizotinga hatua ya makundi ya kombe la Shirikisho (CAF CC) zilikuwa tofauti ukilinganisha na kanuni zilizotumika msimu huu
Zamani ilikuwa timu zilizotolewa kwenye ligi ya mabingwa raundi ya mwisho kuelekea makundi zilipewa fursa ya kucheza raundi ya mwisho kombe la Shirikisho na zinaposhinda zinakwenda kucheza hatua ya makundi ya michuano hiyo
Msimu wa 2022/23 ambayo Yanga ilicheza fainali ya kombe la Shirikisho, ilinufaika na kanuni hiyo ambapo baada ya kutolewa na Al Hilal katika ligi ya mabingwa ilicheza raundi ya mwisho ya mtoano kombe la Shirikisho na kufanikiwa kutinga makundi baada ya ushindi dhidi ya Club Africain
Katika mwaka wake wa kwanza kwenye uongozi wake kama Mwenyekiti wa umoja wa vilabu barani Afrika (ACA), Injinia Hersi Said alipendekeza kanuni hiyo ibadilishwe ili timu zinazocheza ligi ya mabingwa zisipate fursa ya kwenda Shirikisho zinaposhindwa kutinga makundi CAF CL
Hii ni kwa sababu mara nyingi timu zinazocheza CAF CL ni mabingwa wa nchi zao au zile zinazomaliza katika nafasi ya pili wakati timu zinzocheza Shirikisho ni zile zilizomaliza nafasi ya tatu katika ligi zao au kutwaa taji la FA
Mabadiliko hayo yalilenga kuweka uwiano sawa wa ushindani kwenye ligi ya mabingwa na kombe la Shirikisho
Kanuni mpya ilianza kutumika msimu huu ndio maana katika timu zilizoshiriki kombe la Shirikisho kuanzia hatua ya makundi hakuna timu bingwa au iliyomaliza angalau nafasi ya pili kwenye zile nchi ambazo zinatoa timu nne
Pengine mabadiliko haya yamezipa timu unafuu na kufanya vizuri zaidi, unaweza kusema hili ndio kusudio kuu la mabadiliko ya kanuni hiyo
Hii imeongeza ushindano miongoni mwa timu zinazoshiriki Shirikisho kwani karibu zote zinakuwa katika daraja linalofanana
