Klabu ya Yanga SC imeendelea kuthibitisha ubabe wake katika soka la Tanzania baada ya kuichapa JKT Tanzania mabao 2-0 katika mchezo wa nusu fainali ya Kombe la CRDB, uliopigwa kwenye Uwanja wa Mkwakwani, Tanga.
Mchezo huo uliokuwa mgumu kutokana na hali ya uwanja kujaa maji kufuatia mvua kubwa iliyonyesha mapema, haukuwa kikwazo kwa Wananchi kuonyesha makali yao na kufuzu kwa fainali ya tano mfululizo ya michuano hiyo maarufu.
Dube na Mudathir Wafungua Mlango wa Fainali
Bao la kwanza la Yanga lilifungwa na straika wake mahiri Prince Dube, ambaye kwa mara nyingine ameonyesha umuhimu wake katika mechi kubwa. Bao la pili lilifungwa na Mudathir Yahya katika dakika za lala salama, akihakikisha kuwa tiketi ya fainali haibaki ndotoni.
Nafasi Zilizomwagika Kama Maji ya Mvua
Ingawa mabao yalikuwa mawili tu, mchezo huo ulikuwa na nafasi nyingi za wazi ambazo wachezaji wa Yanga kama Stephane Aziz Ki na Maxi Nzengeli walishindwa kuzitumia ipasavyo. Kwa kiwango walichoonyesha, kila mmoja wao alistahili kutoka uwanjani na mpira wa mechi – lakini walikosa bahati.
Sasa Ni Fainali – Muda wa Kujibu Maswali
Kwa matokeo haya, Yanga sasa inasubiri kucheza finali ya Kombe la CRDB. Na kama ujumbe wa mashabiki wa Yanga ulivyo, "bwana yule aliyekimbia Machi 08" sasa hana pa kujificha – kama kweli anataka kucheza na Yanga, fainali ndiyo jukwaa sahihi.
