Katika kile kinachoonekana kuwa mwendelezo wa kuimarisha kikosi kuelekea msimu ujao, Klabu ya Yanga SC inatajwa kumuongezea mkataba mpya kiungo wao mahiri, Mudathir Yahya.
Nyota huyo kutoka Zanzibar ameongeza mkataba wa miaka miwil, hatua inayowapa Wananchi matumaini ya kuendelea kuona ubora wake katika viunga vya Jangwani.
Mudathir ni mmoja wa wachezaji wanaomaliza mikataba mwishoni mwa msimu huu, mabosi wa Yanga tayari wamemalizana nae na kilichosalia ni tangazo rasmi kutoka kwa klabu.
Uamuzi huo umechochewa na kiwango bora anachoendelea kukionyesha msimu huu licha ya changamoto za kiufundi na mabadiliko ya majukumu ndani ya kikosi.
Akiwa na umri wa miaka 29, Mudathir amekuwa mhimili wa kati wa kikosi cha Yanga katika misimu mitatu iliyopita, kipindi ambacho klabu hiyo imekuwa ikitawala soka la Tanzania.
Msimu uliopita ulikuwa wa mafanikio binafsi kwake, alipofanikiwa kupachika mabao 9 katika Ligi Kuu ya NBC, rekodi bora kwake kama kiungo wa kati.
Hata hivyo, msimu huu idadi ya mabao imepungua, akiwa ameweza kufunga mabao 2 pekee hadi sasa. Lakini hiyo haimaanishi kuporomoka kwa kiwango, pengine imechangiwa na kubadilika kimajukumu uwanjani.
Kutokuwepo mara kwa mara kwa Khalid Aucho kutokana na majeraha, kumemlazimu Mudathir kujikita zaidi kwenye jukumu la kiungo mkabaji badala ya kupanda na kushuka kama alivyozoeleka
Kwa nyakati tofauti, Mudathir amecheza sambamba na Duke Abuya ambaye naye amekuwa na msimu wa kipekee. Hii imemfanya Mudathir kuwa mchezaji anayechukua majukumu tofauti kwa mujibu wa mahitaji ya timu
Mudathir amewahakikishia mashabiki wa Yanga kuwa ataendelea kujituma na kuipigania timu hiyo kwa nguvu zote. Amedokeza kuwa “simu zitaendelea kuita kama kawaida”
