Tuzime TV, twendeni tukachukue ushindi uwanja wa Taifa

Yanga ina nafasi ya kutinga robo fainali ya michuano ya kombe la Shirikisho barani Afrika kama itafanya vizuri kwenye michezo mitatu ya nyumbani.

Mchezo wa Jumatano dhidi ya Rayon Sports ni moja ya michezo hiyo mitatu ambayo Yanga lazima ishinde.

Ushindi utapatikana kama mashabiki tutajitokeza kwa wingi kwenye uwanja wa Taifa kuiunga mkono timu yetu.

Huu ndio wakati ambao mashabiki wa Yanga wanapaswa kuwa karibu na timu yao pengine kuliko wakati mwingine wowote.

Kutojitokeza kwa wingi uwanjani kutapunguza zaidi morali ya wachezaji na kuwafanya wajihisi kama wako 'yatima'.

Kocha Mkuu wa Yanga Mwinyi Zahera ameweza kuirudisha Yanga katika hali ya ushindani na ameahidi kikosi chake kitawashangaza wengi kesho.

Kocha huyo asiye na mzaha awapo kazini, aligawa timu kwenye vikosi viwili, kimoja kikisafiri kucheza dhidi ya Prisons na Mtibwa Sugar na kingine akibaki nacho jijini Dar es salaam kukiandaa kwa ajili ya mchezo wa kesho.

Jana wachezaji wote waliingia kambini na leo wanatarajiwa kufanya mazoezi ya mwisho kuelekea mchezo huo utakaoanza saa moja jioni.