Tshishimbi hatihati kuikabili Rayon Sports

Kiungo mahiri wa Yanga Papi Kabamba Tshishimbi huenda asiwepo kwenye kikosi cha timu hiyo kitakachoikabili Rayon Sport kwenye mchezo wa pili wa kundi D, kombe la Shirikisho barani Afrika.

Mchezo huo utapigwa kwenye uwanja wa Taifa kesho Jumatano, May 16.

Tshishimbi alipata majeraha katika mchezo wa marudiano wa kusaka tiketi ya hatua ya makundi dhidi ya Wolaitta Dicha kisha kujitonesha kwenye mchezo dhidi ya Simba, alirejea kwao DR Congo kusaka tiba 'mbadala' ya majeraha yake.

Kuna taarifa kwamba Tshishimbi tayari emerejea jijini Dar es salaam lakini hakuna uhakika kama atacheza mchezo huo kwa kuwa hajafanya mazoezi na wenzake.

Tshishimbi hakuwa miongoni mwa wachezaji waliofanya mazoezi ya mwisho leo asubuhi kuelekea mchezo huo.

Iwapo kiungo huyo mahiri atakosekana pamoja na Said Juma 'Makapu' anayetumikia adhabu ya kadi mbili za njano, huenda kiungo Patto Ngonyani ambaye alikuwemo kwenye kikosi cha Yanga kilichocheza michezo ya ligi dhidi ya Prisons na Mtibwa Sugar akachukua majukumu yao.

Kelvin Yondani na Obrey Chirwa nao wamerejea kikamilifu kuongeza nguvu kwenye kikosi cha Yanga kuelekea mchezo huo.