Yanga kuwabana wachezaji kwenye mikataba

Moja ya mambo yaliyoiathiri Yanga msimu huu ni kusajili wachezaji kwa gharama kubwa halafu wakashindwa kuisaidia timu.

Jambo hili limewagutusha viongozi ambao sasa wameapa kuongeza umakini kwenye usajili wa mwaka huu.

Viongozi hao wamedhamiria kuweka vipengele kwenye mikataba mipya vikavyoweka maslahi sawa kwa pande zote mbili yanapotokea mazingira ya utata kama ilivyotokea kwa baadhi ya wachezaji msimu huu.

Imeelezwa Kocha Mkuu wa Yanga Mwinyi Zahera amependekeza mikataba ya wachezaji iwe na vipengele vinavyoruhusu mikataba hiyo kupitiwa kila baada ya miezi sita.

Ili kuweza kuwanufaisha zaidi wachezaji wanaofanya vizuri lakini pia kuwabana wachezaji ambao hawafanyi vizuri kulingana na maslahi ya mikataba yao.

Uongozi wa Yanga unasubiri mapendekezo ya Zahera ili kuanza zoezi la kuisuka upya timu hiyo iliyokumbwa na misukosuko mingi msimu huu.

Taarifa zaidi zinabainisha kuwa kocha huyo ameahidi kukabidhi ripoti yake kwa uongozi baada ya mchezo dhidi ya Rayon Sports kesho.

Wadadisi wa mambo wanatabiri

Kwa mwenendo aliouonyesha Zahera katika siku zake chache akiwa na kikosi cha Yanga, huenda akashusha 'panga kali' kwa idadi kubwa ya wachezaji.

Hivi karibuni katika mahojiano yake na gazeti la Mwanaspoti, Zahera alibainisha kuvutiwa na wachezaji wawili miongoni mwa sita wa Kimataifa na pia kushangazwa kuwepo kwa idadi kubwa ya wachezaji ambao 'hawana hadhi' ya kuitumikia timu hiyo.

Kocha huyo alibainisha kuwa ndani ya kikosi cha Yanga wamo wachezaji wazuri ambao wanahitaji kuimarishwa zaidi lakini wapo ambao hawastahili kuwepo.