Kocha Mkuu wa Yanga Romain Folz amesema anajivunia kujiunga na klabu kubwa kama Yanga, klabu yenye historia ya kipekee barani Afrika
Folz amesema Yanga ni klabu kubwa barani Afrika ikiwa na sapoti kubwa ya mashabiki, mvuto wake umemfanya asifikirie mara mbili kujiunga na mabingwa hao wa soka Tanzania Bara kwa misimu minne mfululizo
"Nafurahi sana kuwa hapa, ikiwa nitalazimika kueleza kwa nini nimechagua kuwa hapa, ni kutokana na hadhi ya klabu, historia ya klabu bila ya kusahau sapoti kubwa ya mashabiki"
"Mvuto na hamasa ya klabu ya Yanga naamini ni vitu tosha vinavyoweza kumshawishi kocha yeyote kuwa hapa," alisema Folz
Folz amesema anafahamu kazi iliyo mbele yake kwani kwa ukubwa na historia ya klabu ni lazima afanye vyema na kushinda mataji
"Bila shaka ni lazima tupate matokeo bora zaidi, hili ni jambo la kawaida kusema kwa klabu kubwa yenye hadhi kama Yanga"
"Lakini pia tunataka kutoa burudani kwa mashabiki wetu, nitahakikisha wanapenda wanachokiona kutoka kwetu na bila shaka watakuja uwanjani kwa wingi kutuunga mkono"
"Tutahakikisha wanafurahi na kujivunia kile watakachokishuhudia kutoka kwetu uwanjani"
Folz amesema Yanga inapaswa kucheza kama timu kubwa na jukumu lake ni kuandaa mazingira ambayo yataifanya timu ifikie matarajio yake
"Mimi napenda kucheza soka la kuvutia, nataka tutawale mchezo pale tunapokuwa na mpira na hata bila mpira, tutajaribu kuwalazimisha wapinzani wetu kufanya kile tunachotaka"
"Naamini tutakuwa na mchanganyiko bora zaidi kwani falsafa yangu inalingana na matarajio yaliyopo hapa"
