Likizo imemalizika! Ndivyo unavyoweza kusema kwani leo kikosi cha Yanga chini ya Kocha Mkuu Romain Folz kinatarajiwa kuanza maandalizi yake kuelekea msimu mpya wa mashindano 2025-26
Juzi na jana Yanga iliendesha zoezi la kuwafanyia wachezaji vipimo vya afya ambapo kulingana na ratiba iliyotolewa siku chache zilizopita, Folz ameagiza kuanza maandalizi leo ili kukiandaa kikosi chake kwa wiki mbili kabla ya kuelekea Rwanda kuikabili Rayon Sports katika kilele cha Rayon Day August 15
Yanga inatarajiwa kufanya maandalizi yake katika uwanja wa KMC Complex. Maandalizi hayo yatajumuisha wachezaji wote ambao hawako katika majukumu ya timu za Taifa
Nyota wa kigeni waliosajiliwa katika dirisha hili nao wako jijini Dar es salaam Yanga ikiwa bado inaendelea kuwatambulisha wengine
Jana Yanga ilimtambulisha mshambuliaji Andy Boyeli ambapo zoezi hilo linatarajiwa kuendelea leo. Nyota wengine wa kigeni wanaosubiri utambulisho ni kiungo fundi Mohamed Doumbia na kiungo mshambuliaji Ecua Celestine
Wachezaji hao tayari wako jijini Dar es salaam wakiungana na Moussa Balla Conte, Lassine Kouma na Boyeli ambao tayari wametambulishwa
Beki wa kushoto Mohammed Hussein 'Zimbwe Jr' nae anasubiri utambulisho, hata hivyo yeye yuko kwenye majukumu ya timu ya Taifa ya Tanzania 'Taifa Stars' inayoshiriki michuano ya CHAN
Nyota wengine wa Yanga ambao wako kwenye kikosi cha Stars kwa ajili ya CHAN ni Dickson Job, Ibrahim Bacca, Mudathir Yahya, Shekhan Khamis na Clement Mzize
