Bodi ya Ligi Tanzania imetangaza kalenda ya mashindano 2025/26 ambapo michuano ya Ngao ya Jamii itafungua pazia la msimu mpya.
Mabingwa watetezi Yanga wataungana na Simba, Azam na Singida Black Stars katika michuano hiyo kuanzia Septemba 11 hadi 14 mwaka huu.
Kwa mujibu wa kanuni katika mechi za nusu fainali Yanga, itakwaana na Azam FC, huku Simba ikiikabili Singida Black Stars
Ni kama marudio ya fainali ya msimu uliopita Yanga ikitwaa Ngao hiyo baada ya kuichapa Azam Fc mabao 4-1
Katika msimu huo Wananchi walicheza nusu fainali dhidi ya Simba iliyomaliza nafasi ya tatu na Yanga kuibuka na ushindi wa bao 1-0
Wakati huu Yanga inakutana tena na Azam Fc katika mchezo ambao utakutanisha makocha wapya katika ligi kuu
Romain Folz ataiongoza Yanga huku Florent Ibenge akiiongoza Azam Fc, bila shaka itakuwa mechi yenye hadhi ya fainali
Mshindi wa mchezo huo atatinga fainali ambapo Septemba 14 atachuana na mshindi kati ya Simba dhidi ya Singida Black Stars
Yanga imeweka rekodi ya kibabe katika michuano hiyo kwani kwenye misimu minne iliyopita imeshinda Ngao tatu
