Yanga imebeba taji jingine mapema baada ya kuichapa Rayon Sports mabao 3-1 katika mchezo wa kilele cha Rayon Sports Day uliopigwa uwanja wa Amahoro, Rwanda
Bao la mapema la kujifunga Aziz Andabwile lilikaribia kuvuruga mipango ya Yanga katika mchezo huo lakini kikosi cha kocha Romain Folz kilionyesha ukomavu wake
Mshambuliaji Andy Boyeli aliisawazishia Yanga akiitendea haki pasi ya Pacome Zouzoua kabla ya kumtengenezea Pacome kufunga bao la pili na kuipeleka Yanga mapumziko ikiwa na uongozi wa mabao 2-1
Katika kipindi cha kwanza Yanga ilitengeneza nafasi za wazi mbili au tatu lakini unaweza kusema mwamuzi alijitahidi kupunguza machungu kwa wenyeji
Kipindi cha pili Folz alifanya mabadiliko karibu timu nzima, nahodha Bakari Nondo Mwamnyeto akifunga bao la tatu dakika za lala salama
Katika mchezo huo, Yanga ilimtambulisha winga Edmund John ambaye amesajiliwa kutoka klabu ya Singida BS
