Klabu ya Yanga itahitimisha kilele cha Wiki ya Mwananchi mnamo Septemba 12 kwa mchezo wa kimataifa wa kirafiki dhidi ya Bandari FC ya Kenya.
Tamasha hilo, ambalo limekuwa utamaduni mkubwa wa Wananchi, linalenga kuwatambulisha mashabiki wachezaji wapya pamoja na wale wa kikosi cha zamani pamoja na kukaribisha msimu mpya.
Nahodha wa Yanga, Bakari Mwamnyeto, ametoa mwaliko maalum kwa mashabiki wa timu hiyo kuhakikisha wanajitokeza kwa wingi kushuhudia kile ambacho klabu imewaandalia.
Mwamnyeto amesema maandalizi yanaendelea vyema Avic Town akiwahakikishia mashabiki wameandaliwa burudani ya aina yake kutoka kwa timu yao
“Sisi tunaendelea vyema na maandalizi ya siku hii kubwa na yenye furaha kwa klabu ya Yanga. Niwaambie mashabiki wajitokeze kwa wingi kuja kushuhudia kile tulichowaandalia. Kila mchezaji hapa kambini ana shauku kubwa ya kusubiri siku hii ya aina yake,” alisema Mwamnyeto.
Yanga, ikiwa kambini Avic Town, inaendelea na maandalizi yake kuhakikisha kila kitu kinakwenda sawa kuelekea tamasha hilo kubwa ambalo limekuwa tukio muhimu kwenye kalenda ya mabingwa hao wa nchi.
Mashabiki wanatarajiwa kushuhudia burudani ya kipekee uwanjani, ikiwemo kutambulishwa kwa kikosi kipya, burudani, na mchezo wa kirafiki dhidi ya wageni kutoka Kenya, Bandari Fc
