Mtendaji wa klabu ya Yanga Andre Mtine amesema wametua Angola wakiwa na dhamira moja tu, kushinda mchezo wa hatua ya awali ligi ya mabingwa dhidi ya Wiliete Sc utakaopigwa kesho Ijumaa
Kikosi cha Yanga kilitua Luanda jana kuelekea mchezo huo utakaopigwa ndani ya jiji la Luanda majira ya saa 12 jioni kwa saa za Tanzania
Mtine ambaye ameongoza msafara wa Yanga, amesema wanatambua wanakwenda kucheza na timu imara hivyo benchi la ufundi limefanya maandalizi ya kina ili kuhakikisha wanaanza vyema katika michuano hiyo
"Tumewasili hapa Angola salama kuelekea mchezo wetu wa ligi ya mabingwa dhidi ya Wiliete Sc. Tumefanya maandalizi ya kutosha, benchi letu la ufundi limepata nafasi ya kuwasoma wapinzani wetu na kufanya maandalizi sahihi kuelekea mchezo huu"
"Niwaombe mashabiki watuombee dua ili tuweze kupata matokeo mazuri katika mchezo huo na kuhakikisha tunatimiza malengo yetu," alisema Mtine
Naye Meneja wa habari na Mawasiliano wa Yanga Ali Kamwe alisema baada ya kutua Angola jana, usiku timu ilifanya mazoezi maalum ya Gym kuondoa uchovu na leo watafanya mazoezi ya mwisho kwenye uwanja utakaotumika hapo kesho
Yanga iliondoka Tanzania alfajiri ya jana takribani masaa nane baada ya mchezo wa Ngao ya Jamii dhidi ya Simba ambao Wananchi waliibuka na ushindi wa bao 1-0
Ni kama Wiliete Sc wamechagua mchezo huo kupigwa Septemba 19 wakiamini pengine nyota wa Yanga bado watakuwa na uchovu wa dabi
