Mabao mawili ya kipindi cha pili yaliyofungwa na Pacome Zouzoua na Aziz Andabwile yametosha kuihakikishia Yanga ushindi wa mabao 2-0 dhidi ya Wiliete SC katika mchezo wa mkondo wa pili hatua ya awali ligi ya mabingwa barani Afrika
Dakika 45 za kipindi cha kwanza zilimalizika kwa timu hizo kutofungana Wiliete SC wakionekana kuimarika zaidi katika ulinzi tofauti na walivyocheza mechi ya kwanza nyumbani
Mabadiliko ya kipindi cha pili yaliyofanywa na kocha Romain Folz kwa kuwaingiza Edmund John na Offen Chikola nafasi ya Maxi Nzengeli na Mudathir Yahya yaliiongezea Yanga kasi ya mashambulizi kupitia pembeni
Pacome alifunga bao la uongozi dakika ya 70 baada ya kupasiana na Andy Boyeli ambaye pia aliingia kipindi cha pili kuchukua nafasi ya Dube
Andabwile akaweka kambani bao la pili dakika ya 86 kwa kichwa akimalizia kona ya Chikola
Yanga inasonga mbele raundi ya kwanza kwa ushindi wa jumla wa mabao 5-0 kufuatia ushindi wa mabao 3-0 katika mchezo wa mkondo wa kwanza
Sasa itachuana na Silver Strikers ya Malawi katika mchezo wa raundi ya kwanza
