Uongozi wa Yanga huenda ukamrejesha aliyekuwa kocha wa viungo wa timu hiyo Adnan Behlulovic aliyehudumu kwenye nafasi hiyo wakati Yanga ikinolewa na Sead Ramovic.
Baada ya maoni na mapendekezo ya Wanayanga wengi juu ya kutoridhishwa na utimamu wa wachezaji wao, ni kama uongozi umesikia kilio na sasa wako mbioni kumshusha Behlulovic kuchukua nafasi ya Mokaila Tsephang ambaye alirejea Botswana baada ya kupata msiba wa kufiwa na mama yake mzazi.
Baada ya Yanga kusitisha mkataba wa kocha Romain Folz na wasaidizi wake, ni Mokaila pekee aliyekuwa amesalia benchini yakiwa ni mapendekezo ya kocha mpya Pedro Goncalves aliyehitaji kufanya nae kazi kwa muda ili kujiridhisha kama anatosha au la.
Wakati Yanga inanolewa na Ramovic, 'Gusa Achia Twende Kwao' ilizaliwa, soka la kasi huku wachezaji wakifanya 'pressing' bila kuchoka.
Behlulovic ndiye aliyehakikisha wachezaji wanakuwa fit na 'natanki' yao yamejaa muda wote wa mchezo.
Mashabiki bado wana taswira ya Yanga hiyo na pengine ndio sababu licha ya timu yao kuendelea kufanya vyema kwenye ligi, bado wanaona kuna kitu kinakosekana.
