Rais wa Yanga Injinia Hersi Said yuko nchini Uganda kukamilisha usajili wa kiungo mshambuliaji Allain Okello anayeitumikia klabu ya Vipers Fc, imefahamika.
Taarifa kutoka Uganda imedokeza kuwa mapema leo Hersi alikuwa na mazungumzo na Rais wa klabu ya Vipers Fc Laurence Mulindwa kwa ajili ya kuhitimisha mchakato wa usajili wa nyota huyo.
Vipers Fc waligomea ofa ya kwanza ya Yanga, wakihitaji dau nono zaidi ili kumuachia mchezaji huyo bora zaidi ligi kuu ya Uganda kwa sasa.
Mwishoni mwa mwaka jana, Hersi aliweka wazi dhamira yake ya kumsajili Okello katika dirisha hili na hata kama itashindikana sasa, atamsubiri dirisha kubwa wakati huo mkataba wake na Vipers Fc utakuwa umemalizika.
Habari njema ni kuwa baada ya mazungumzo baina ya viongozi hao, mwafaka umefikiwa na sasa kinachosubiriwa ni kukamilishwa kwa mchakato wa usajili.
Mazungumzo binafsi kati ya Okello na Yanga yalikamilika mapema, kilichokuwa kinasubiriwa ni ruhusa kutoka klabu yake ili aweze kutua Yanga.
