Kocha Mkuu wa Yanga Pedro Goncalves jana kwenye mchezo wa ligi kuu dhidi ya Mashujaa Fc, alimtumia dakika zote 90 kiungo mshambuliaji Allan Okello.
Okello amejiunga na Yanga katika dirisha hili akitokea klabu ya Vipers Fc ya Uganda. Mchezo wake wa kwanza Yanga imeibuka na ushindi wa mabao 6-0.
Katika mchezo huo, Okello alikuwa mchezaji pekee miongoni mwa waliotua kwenye dirisha dogo ambaye alicheza kwa dakika zote 90.
Hiyo inatosha kuonyesha imani aliyonayo Goncalves kwa kiungo huyo fundi ambaye ujio wake unakwenda kuwarahisishia kazi washambuliaji wa Yanga.
Unaweza kusema sasa Yanga imeziba pengo la Stephane Aziz Ki baada ya kumpata Okello.
Katika mchezo dhidi ya Mashujaa Fc alitengeneza nafasi nne moja ikiwa adimu kwa Duke Abuya huku mpira wake wa faulo dakika za lala salama ukimaliziwa na Depu baada ya mlinda lango Erick Johora kutema.
Okello hajahitaji muda kudhihirisha kipaji chake, bila shaka mengi mazuri yanakuja..!
