Licha ya kushindwa kupenya robo fainali ya michuano ya ligi ya mabingwa barani Afrika (CAFCL), Yanga imesogea hadi nafasi ya 10 kwenye msimamo wa CAF wa vilabu Afrika.
Yanga imemaliza nafasi ya tatu kundi B, ikikusanya jumla ya alama 35 katika kipindi cha miaka mitano iliyopita ya ushindi wa michuano ya CAF.
Imepanda juu kwa nafasi ya mbili kutoka nafasi ya 12 msimu uliopita. Inaweza kuonekana msimu huu Yanga haijafanikiwa kwenye malengo yake lakini ni wazi katika kipindi cha miaka mitano imepiga hatua kubwa.
Imeingia hatua ya makundi ya ligi ya mabingwa kwa misimu mitatu mfululizo, msimu mmoja ikicheza robo fainali.
Lakini pia katika miaka mitano, Yanga imeweza kucheza fainali ya kombe la Shirikisho ikiwa ndio hatua kubwa zaidi Wananchi wakikaribia kuwa mabingwa lakini kanuni zikagoma kuwa upande wao.
Mafanikio haya yote yamepatikana tangu Mfadhili/Mdhamini wa Yanga GSM alipoanza uwekezaji wake akiwa ameirejesha Yanga kwenye medani za Kimataifa.
Katika mashindano ya ndani hakuna mjadala kwani katika kipindi cha miaka minne, Yanga imeshinda mataji yote ya ndani, wakifanya hivyo katika kila msimu.
