Mshambuliaji wa Yanga Laurindo Aurelio 'Depu' jana aliendeleza 'moto' wake wa kuzifumania nyavu akifunga bao pekee la ushindi wa Yanga katika mchezo wa ligi kuu dhidi ya Tanzania Prisons.
Katika mchezo huo uliopigwa uwanja wa Jamhuri mkoani Dodoma, Wananchi waliibuka na ushindi wa bao 1-0 na kujikita kileleni mwa msimamo wa ligi kwa tofauti ya alama 7 baada ya kufikisha alama 35.
Depu ambaye aliondoka na tuzo ya nyota wa mchezo, alifunga bao hilo kwenye dakika ya 78 akimalizia mpira uliotemwa na mlinda lango wa Prisons Mussa Mbissa.
Hilo lilikuwa bao la sita kwa Depu kwenye ligi akimfikia mshambuliaji mwenzake Prince Dube. Ikumbukwe Depu amejiunga na Yanga mwishoni mwa mwezi Januri katika usajili wa dirisha dogo na amekuwa na wastani wa kufunga katika kila mechi.
Jumla sasa amefunga mabao 11 katika mechi 10 alizocheza kwenye mashindano yote.
Ni wazi huu unaweza kuwa msimu wa maajabu kwa Depu, anahitaji kufunga mabao mawili tu kumfikia Fabrice Ngoy wa Namungo Fc ambaye ndiye anaongoza orodha ya vinara wa mabao kwenye ligi kuu ya NBC.
