Ligi Kuu ya NBC inaendelea leo ambapo mabingwa watetezi Yanga wako ugenini mkoani Arusha kuikabili TRA United mchezo utakaopigwa uwanja wa Sheikh Amri Abeid.
Ni mechi nyingine ngumu kwa Wananchi ambao karibuni wamekabiliwa na ratiba ya mechi mfululizo, kwa wastani wakishuka dimbani kila baada ya siku tatu kupambana na mechi za viporo.
Licha ya changamoto hiyo, mkufunzi wa Yanga Pedro Goncalves alisema nyota wake watapambana na kuhakikisha wanaondoka na ushindi katika mchezo huo ambao utahitimisha mechi 15 za duru ya kwanza.
Kikosi cha Yanga kilitua Arusha juzi na jana wakapata nafasi ya kukamilisha maandalizi yao katika dimba la Sheikh Amri Abeid ambapo mchezo huo utapigwa.
Mabingwa hao watetezi watakosa huduma ya baadhi ya nyota wake akiwemo beki Ibrahim Bacca na mshambuliaji Depu ambao walipata majeraha katika mchezo uliopita dhidi ya Azam FC.
TRA United inayonolewa na kocha Etienne Ndayiragije imekuwa na wakati mzuri wa kujiandaa na mchezo huo ikipata takribani wiki nzima ya kujifua baada ya mchezo wao dhidi ya Simba uliopaswa kuchezwa March 14 kupigwa kalenda.
Mtanange huo utapigwa saa 10 jioni...
