Mkwasa ataja sababu ya 'kuficha' usajili wa Yanga

Katibu Mkuu wa Yanga Charles Mkwasa amesema klabu hiyo itaweka wazi wachezaji inaowasajili baada ya kufunguliwa kwa dirisha la usajili.

Mkwasa amesema vilabu vinavyofanya usajili sasa vinakiuka kanuni kwa kuwa dirisha la usajili bado halijafunguliwa.

"Unajua klabu zinazosajili hivi sasa zinaenda kinyume na utaratibu wa usajili, na hii yote ni kwasababu dirisha bado halijafunguliwa," amesema Mkwasa

Msimu huu Yanga imekuwa ikifanya usajili wake kwa usiri mkubwa tofauri na miaka mingine.

Ukiacha sababu iliyotolewa na Mkwasa, sababu nyingine ya kusajili kwa usiri ni kukwepa 'hujuma' zinazofanywa na baadhi ya timu.

Yanga haikufanikiwa kusajili wachezaji wote iliyokuwa imeweka wazi kutaka kuwasajili baada ya 'kuwahiwa' na timu nyingine.

Wachezaji kama Adam Salamba, Mohammed Rashid, Tiber John, Habibu Kiyombo na Marcel Kaheza kwa nyakati tofauti walihusishwa na Yanga lakini ni vilabu vya Simba na Singida United vilivyowasajili.

Mkwasa aliwahi kunukuliwa na gazeti moja la kila siku akisema kuwa wamebaini kuna timu zinasajili kwa kuitumia Yanga, zinasubiri Yanga isema inataka kumsajili nani.

Mkwasa amewahakikishia wapenzi na wanachama wa klabu hiyo kongwe kuwa wako makini na zoezi la usajili.

"Mashabiki na Wanachama wetu wawe na subira. Wakati ukifika kila kitu kitawekwa wazi."